Rondom Skoutyd in 1991 het die nimlike Koningin Elizabeth II van Groot Brittanje Namibia op uitnodiging van die destydse president van Namibia, Pres. Sam Nujoma, besoek en vir bykans 'n week lank het almal met almal hand geskud. Of soos ons Afrikaners sê, blad gesteek. Ek ook - met mnr. Nujoma (maar dit was nie die eerste of laaste keer nie), die fyne koningin van weleer en selfs die ontslape Prins Philip, destyds die Hertog van Edinburg en soos Namlish wil, The Duck of Edenburra.
My kans het gekom op Oshakati op die stoep van die Internasionale Gastehuis, waar die Koninklike paar en pres. Nujoma middagete geniet het. Die gepeupel het in die aanloop na die ingang van die gastehuis saamgedrom waar die hooggeplaasdes aangestap gekom het en die president het weg berei en mense voorgestel, waarna sy in haar koninklike hoogheid kom dagsê het en daar haar klein handjie aangebied het. Daar staan ek toe en gloei in my anderse uitsonderlikheid tussen die plaaslike massas en Nujoma skud my blad, gesels 'n woord of twee en toe volg die Queen en daarna die waardige Duke. Hy was die spraaksame een: "You seem out of place here," het hy gesê en ek het geantwoord; "I wanted to be here, sir". Ek het "sir" gesê, want ek het nie geweet hoe hy aangespreek moes word nie. Ek wil mos staan en wit wees in Afrika.
Later in die week het ons mekaar weer raakgeloop, maar dit was by die Windhoekse Skou waar sy vir Hollie Kronsbein van Grootfontein gelukgewens het met sy Grootkampion Simmentaler-koei wat met 'n koninklike medalje omhang is. Ek kon 'n tweedehandse handdruk van die koningin kry, want sy het Hollie een gegee en daarna het Hollie my weer gegroet. Só gaan die groot oomblikke van die een na die ander.
(Terloops, Hollie het so naby aan Grootfontein, kort agter die lughawe, geboer waar ek nou nog glo hy daardie kampioenkoei elke dag met 'n wegneemete uit die Nord Hotel se kombuis gevoer het. Hy was ook die befaamde Duitser wat 'n 750ml Windhoek bier 'n Hollie Dumpie gedoop het.)
Die foto van die Koningin se besoek deur The Crown Cronicles.co.uk (1991) het my inderwaarheid laat besef dat ek voor 1990 - toe Namibia Onafhanklik geword het - teen Sam Nujoma gewerk het en dat ek as koerantman ná 1990 tot 'n groot mate met hom saam gewerk het om die Namibia te probeer skep waar ek nou nog gelukkig woon.
Om die politieke geskille, verskille, welslae en mislukkings van die laaste 35 jaar in 'n oordenking van die president se lewe op te rakel, is nie nodig nie, behalwe om te sê; jy het 'n waardevolle en interessante bydrae gelewer Pres. Nujoma. Rus maar in vrede. Ek dink nogal die Kalunga het jou werk raakgesien. Hy het die verkeerde dinge vergewe en jou 'n lang lewe gegee.
.png)
SUBMIT YOUR COMMENT